Si do te dukej bota pa ne?

Titulli: Si do te dukej bota pa ne? Tue Nov 18, 2008 10:26 am

Natyra
do të pushtonte Tokën, ndërsa kafshët rrugët. Mirë se erdhët në
planetin tokë! Popullsia 0. Mund ta shihni me sytë tuaj se si do të
dukej bota pa ne. Pamjet e mëposhtme janë krijuar për të ilustruar se
çfarë do të ndodhë nëse qeniet njerëzore nesër nuk do të ishin më dhe
nëse për çfarëdolloj arsyeje njerëzimi do të jetë zhdukur.
Ndoshta
duke qenë pa ne, shkatërruesit më të mëdhenj, sigurisht që natyra do të
fillojë të mendojë seriozisht për veten. Fushat dhe kullotat do të
mbuloheshin nga bari dhe pyjet, ajri dhe uji do të pastroheshin nga
ndotjet dhe rrugët dhe qytetet do të mbuloheshin nga gjelbërimi. "E
vërteta e hidhur është se peizazhi do të përmirësohej dukshëm sapo
qeniet njerëzore të dilnin nga skena", shprehet John Orrock, një biolog
i qendrës kombëtare për analizat ekologjike në Santa Barbara, në
Kaliforni. Çështja që shtrohet është kjo: Për sa kohë do të vazhdojnë
të ruhen "mbeturinat" e qytetërimit tonë? Çfarë do të lëmë pas? Çfarë
do të mësojë një alien rreth nesh kur të zbresë në tokë 100 vjet ose më
shumë kohë pasi të jemi zhdukur? Përgjigjja: Sigurisht, asgjë.

Sepse
brenda 100 vjetësh shumica e gjurmëve për jetën tonë moderne do të jetë
shkatërruar plotësisht nga moti, gërryerja, lëkundjet e tokës, kafshët
që do të kenë ngelur gjallë, insektet dhe bakterit. Por ajo çka është
më e çuditshme ka të bëjë me faktin se monumentet dhe hieroglifët e
qytetërimeve antike do të ruhen më shumë se sa ndërtesat, miliona
librat dhe kujtimet tona elektronike. Alienët që mund të vizitojnë
tokën, ndoshta do të mendojnë se qytetërimi i fundit mbi tokë ka qenë
ai egjiptian. Pikërisht tema mbi qytetërimin e shekullit XXI ishte në
qendër të kërkimeve të një dokumentari televiziv, "Life After People".
E gjithë kjo nuk është aspak një supozim. Për rreth 2 orë e gjysmë
specialistët e shkencës kanë analizuar me kujdes mbi të ardhmen e
tokës, kur në të të mos ketë ngelur asnjë njeri i gjallë. "Brenda një
kohe të shkurtër, maksimumi brenda një ose dy ditësh, do të fillonin
blackout-ët e parë, pasi askush nuk do të kujdesej më për centralet",
shpjegon Gordon Masterton, president i Institutit të Inxhinierisë
Civile në Londër.

Burimet e energjisë së rinovueshme, si
turbinat me erë, apo panelet diellore, do të mbanin të ndezura
automatikisht pak drita, por pa mirëmbajtjen e rrjetit të shpërndarjes,
edhe ato do të dilnin jashtë përdorimit brenda pak javëve. Pa
elektricitetin do të ndalonin pompat elektrike, impiantet për
funksionimin e kanalizimeve për ujërat e zeza dhe të gjitha aparaturat
e tjera të shoqërisë moderne. Mungesa e mirëmbajtjes do të çonte drejt
shkatërrimit ndërtesa, rrugë, ura dhe struktura të tjera.
Konstruksionet moderne janë projektuar për të duruar mesatarisht 70
vjet, urat deri në 120 dhe digat deri në 250, por kjo parashikon edhe
mundësinë që dikush t‘i mbajë të pastra dhe të zgjidhë problemet e
herëpashershme që mund të shfaqin. Dhe pa njerëzit që mund t‘i kryejnë
këto detyra, që në pamje të parë duken të parëndësishme, gjërat do të
shkonin shumë shpejt drejt shkatërrimit. "Dritat shumë shpejt do të
fiken në të gjithë botën dhe të vetmet që do punojnë edhe për disa kohë
do të jenë turbinat me erë, por pas disa javësh planeti do të zhytet në
një errësirë të thellë, që nuk që është parë që nga koha kur njerëzit e
parë primitivë grumbulloheshin rreth zjarrit", tregon ai. Pas gjashtë
muajsh, zonat urbane do të nisin të ripopullohen nga kafshët, përshi
këtu edhe ato ish-shtëpiaket.

Brenda 20 vjetësh, ujqërit dhe
arinjtë do të jenë "padronët" e vetëm të rrugëve dhe çdo ndërtesë e
bërë me dru do të nisë të shkatërrohet, veçanërisht aty ku "lulëzojnë"
termitet. Edhe strukturat e forta prej çeliku do të nisin të
shkatërrohen. Pas 40 apo 50 vjetësh, gërryerja e çelikut, inkursioni i
rrënjëve bimore dhe efektet e motit nënkuptojnë se ndërtesat moderne do
të nisin të bien. Brenda një shekulli pothuajse të gjitha makinat do të
jenë ndryshkur tërësisht. Ndërtesat prej xhami do të bien, ndërtesat
prej guri do të shkatërrohen, i ftohti dhe bora do të kthejnë rrugët në
gërmadha, do të dalin në sipërfaqe ujërat nëntokësore, metrotë do të
përmbyten, ndërsa pjesë të tëra të qytetit do të mbulohen nga bari. Për
shembull, Londra do të përmbytet pas vërshimit të Tamizit, ashtu
sikurse Spanja, Franca apo Roma. Minjtë do të jenë ushqimi i preferuar
i fajkonjve dhe skifterëve. Në fund, kafshët e mëdha do të rishfaqen
sërish brenda 100 vjetësh. Gjysmë milion elefantët e Afrikës do të jenë
shtuar në dhjetë milionë ose më shumë. Gjëja e gjallë, si demat apo
delet, do të zhduken ngadalë nga grabitqarët agresivë. Ndërkohë,
kujtimet më të çmuara të historisë dhe kulturë sonë, që janë ruajtur
nëpër arkiva me temperaturë dhe lagështi të kontrolluar, do të jenë
zhduken gjithashtu. Pjesa më e madhe e kujtimeve njerëzore, si librat,
fotografitë, të dhënat elektronike, do të jenë çngjyrosur duke lënë pak
gjurmë që dëshmojnë për ekzistencën tonë.

Marre nga : Gazeta Shqip