AIDS ne Shqiperi

Sida: Të prekur 251 persona në Shqipëri

Të prekur nga virusi vdekjeprurës në Shqipëri janë të identifikuar 251 persona, nga grupet më në nevojë si homoseksualë, përdorues të drogave me injektim, romë etj.


30 Nentor 2007 - Sipas specialistëve, “edhe pse ende në shifra të ulëta, infeksionet nga virusi HIV në Shqipëri po shtohen me ritme të shpejta. Vetëm gajtë 2007/ës janë diagnostikuar 40 raste te reja." Nga të dhënat mbi rastet e identifikuara 87% e të infektuarve e kanë marrë virusin nëpërmjet marrdhënieve seksuale të pambrojtura.

Nga studimet ka rezultuar se 60% e rasteve janë infektuar në emigracion dhe 40% në vend, ndërsa në qytet janë 67% e të rpekurve dhe 33% në zonat rurale. Por ende në vend nuk ka një qendër trajtimi për personat e infektuar. Madje shoqëria në mungesë të informacionit sesi përhapet virusi tregohet izoluese ndaj rasteve të njohura si persona të prekur, ngjarja e dy fëmijëve në një shkollë në kryeqytet ku prindërit e fëmijëve të tjerë kërkonin vecim të tyre nga kolektivi i fëmijëve.

Ndërsa numri i dhuruesve të gjakut në vend ka pësuar ulje, për rrjedhojë edhe numri i personave që testohen është ulur ndjeshëm. Në nevojat e emergjencave për ndërhyrjet kirurgjikale po praktikohet dhurimi i gjakut i detyruar nga vetë familjarët e pacientëve. Kështu që gjaku i grumbulluar krijon rezervat në bankën e emergjencave. Ndërsa edne paragjykohet praktika e testimit vullnetar edhe për vetë procesin e hapur dhe pak konfidencial. Testimi vullnetar mund te kryhet në laboratorin e Institutit të Shëndetit Publik në Tiranë, në qendrën spitalore “Nënë Tereza” po në Tiranë, si dhe në disa qendra të testimit dhe Këshillimit vullnetar në disa rrethe të vendit të rihapura sërish pranë qendrave spitalore.

Specialistët mjekë apelojnë jo vetëm për marrdhënie të sigurta seksuale por edhe për një trajtim më human të personave të prekur nga virusi.
Nën moton se askush nuk është imun nga virusi dhe kushdo mund ta marrë nëse nuk mbrohet, shumë organizata të rinjsh në ditën ndërkombetare në 1 dhejtor po apelojnë për masat mbrojtëse nën logon “Merr në dorë Fatin tënd”.

SIDA: Epidemia shtohet, 2,5 milion infeksione të reja gjatë vitit 2007

_______________________

(1 dhjetor) është Dita e Sidës. Ideja e caktimit të një dite të veçantë për të ndërgjegjësuar publikun mbi problemin e HIV-it dhe Sidës lindi në takimin e ministrave të shëndetësisë në vitin 1988. Rajoni nën-saharian mbetet zona e globit e prekur më rëndë nga Sida, por epidemia nuk ka lënë jashtë asnjë vend të botës.

Në Ditën e Sidës në mbarë botën zhvillohen aktivitete për ndërgjegjësimin e publikut mbi këtë sëmundje. Por në San Francisco këto aktivitete nuk kufizohen vetëm në një ditë të vitit. Në korrik të këtij viti, 25 mijë banorë të qytetit morën pjesë në ecjen vjetore për Sidën. Mark Cloutier u angazhua në organizimin e aktivitetit: "Këto aktivitete tërheqin vëmendjen për këtë sëmundje dhe ngrenë ndërgjegjësimin". Ato ndihmojnë edhe për grumbullim fondesh në mbështetje të personave të prekur nga virusi HIV, që shkakton Sidën.

Programe si ecja për Sidën, analiza gjaku falas dhe informacion për sëmundjen janë pjesërisht arsyeja e stabilizimit të numrit të personave që janë prekur nga ky virus, deklaron Organizata Botërore e Shëndetësisë. Megjithatë përllogaritet se 33 milionë vetë në mbarë botën janë të infektuar nga virusi HIV.

Këtë vit u shtuan 2 presje 5 milionë të infektuar të tjerë, ndërsa numrit të personave që kanë vdekur nga Sida iu shtuan edhe 2 milionë vetë. Tetë vende afrikane numërojnë afro 1 të tretën e të gjithë infektimeve dhe vdekjeve të reja nga HIV-i.

Organizata Botërore e Shëndetësisë njofton se infektimet janë shtuan në masën 150 për qind në Evropën Lindore dhe Azinë Qendrore gjatë 6 viteve të fundit. Të dhënat tregojnë se numri i personave që jetojnë me HIV është shtuar mbi 2 herë në Vietnam, kurse Indonezia ndeshet me ritmet më të shpejta të përhapjes së epidemisë.

Kombet e Bashkuara dhe qeveria kineze përllogarisin në statistika të publikuara para pak ditësh se në Kinë ka 700 mijë të infektuar, një shifër që përfaqëson më pak se 1 për qind të popullsisë, por raporti tregon se 30 deri në 50 milionë vetë janë të kërcënuar për arsye të aktiviteteve të rrezikshme. Progamet kundër HIV-it dhe Sidës kanë marrë më shumë fonde vitet e fundit.

Presidenti Bush i ka bërë Shtetet e Bashkuara vendin kryesor në botë në mbështetje të luftës kundër virusit."Ky investim ka dhënë rezultatin më të mirë – ka shpëtuar jetë", tha presidenti. Edhe sektori privat ka shtuar donacionet për programe, përkrah shumë qeverive të angazhuara në këtë betejë.

Qeveria tailandeze veçohet për përpjekjet e saj, si programet e posaçme për të luftuar njollën morale që i shoqëron personat e prekur nga virusi. Personat me HIV mund të marrin kredi të vogla për të filluar biznes me një ortak që nuk është i prekur nga virusi. Të dy përfitojnë nga kredia dhe ata që dikur u trembeshin personave të infektuar, bëhen tani klientë të biznesit të tyre.

James Wagoner është president i organizatës Veprimtarë për Rininë, e cila përqëndrohet në nxitjen e veprimtarive që kufizojnë rrezikun ndaj të rinjve. Çdo ditë, thotë ai, 6 mijë të rinj në botë infektohen me HIV: "Problemi kryesor është fakti që politikanët nuk e pranojnë se ekziston ky rrezik, nuk tregohen realistë për nevojën e informimit seksual të të rinjve. Ata nuk përfillin studime që tregojnë se të rinjtë që marrin informacion për praktikat e sigurta seksuale, për përdorimin e profilaktikëve, nuk janë më aktivë seksualisht, megjithë kundërshtimet që ngrenë qeveri dhe politikanë të ndryshëm".

Tema e Ditës Botërore të Sidës për këtë vit përqendrohet tek roli i udhëheqjes politike dhe sociale për të ndalur përhapjen e virusit HIV/ Sidës. Ironia qëndron në faktin se Uashingtoni, kryeqyteti i Shteteve të Bashkuara që dhurojnë shumat më të mëdha në luftën kundër Sidës, përfaqëson përqindjet më të larta të infektimit dhe prekjes nga Sida në Amerikë.

Kosova në Ditën Botërore kundër Sidës - gjithsej 69 raste me virusin

______________

Kosova radhitet në mesin e vendeve me numër të vogël të të infektuarve me virusin HIV/AIDS, por, sipas virusologut Safet Blakaj edhe numri i qytetarëve që kryejnë testet vullnetare të infeksionit me këtë virus është i ulët. Në Ditën Ndërkombëtare të Luftës Kundër AIDS-it, Institutit Kombëtar i Shëndetësisë Publike, numëron gjithsej 69 raste me virusin HIV/AIDS që nga rasti i parë i diagnostifikuar në Kosovë më 1986.

Ka më shumë se njëzet vjet që edhe Kosova është përballur me virusin HIV/AIDS, ndonëse në përmasa shumë më të vogla se shumë vende të botës. Megjithatë, kjo nuk është më një sëmundje që u ndodhë të tjerëve. Rasti i parë në Kosovë është diagnostifikuar më 1986 dhe prej atëherë, sipas Institutit Kombëtar të Shëndetësisë Publike, në Kosove janë regjistruar 69 raste me HIV.

Sipas këtij instituti, nga pasojat e kësaj sëmundjeje kanë vdekur 27 te sëmurë. Virusologu Safet Blakaj, nga qendra Labirint, thotë se Kosova radhitet në mesin e vendeve me numër të vogël të të infektuarve me virusin Hiv Aids. “Kosova qëndron tek shtetet me numër të ultë të të sëmurëve me HIV/AIDS, por ky fakt nuk ishte dashur që të na gëzonte sepse rreziqet janë të mëdha. Ne kemi numër të vogël të të infektuarve, por, po ashtu kemi edhe numër të vogël të atyre që kryejnë testet për virusin HIV/AIDS, andaj është shumë i nevojshëm që funksionimi i qendrave për testim vullnetar të rritet, në mënyrë që njerëzit të verifikojnë statusin tyre të infeksionit”, thotë virusologu Safet Blakaj, i cili shton se “Numri i përgjithshëm i atyre që jetojnë me virusin HIV në Kosovë shënon 7 persona, ndërsa sipas statistikave, janë rreth 65 deri në 70 raste që nga diagnostifikimi i rastit të parë në Kosovë më 1986”.

Dita ndërkombëtare e luftës kundër AIDS-it, në Kosovë është shënuar me disa veprimtari më shumë në ndërgjegjësimin e qytetarëve për rreziqet e kësaj sëmundjeje. E mbështetur nga Organizata Botërore e Shëndetësisë,

Ministria e shëndetësisë e Kosovës ka organizuar në Gjakovë trajnime dyditëshe për profesionistët dhe grupet e caktuara që merren me parandalimin e përhapjes së kësaj sëmundjeje. Agjencia Amerikane për Zhvillim Ndërkombëtarë po mbështet një veprimtari disaditëshe me moton “Ndaloni Aids-In – Mbajeni Premtimin”, e përqendruar më shumë në ndërgjegjësimin e të rinjve.